თავის მოვლის დამხმარე საშუალებები, რომლებსაც მოიცავს TAP
TAP მოდულები მოიცავს ზოგიერთ ყველაზე ხშირად გამოყენებად თავის მოვლის დამხმარე საშუალებას, მათ შორისაა:
- შხაპის სკამები
- უნიტაზის სკამები
- სითხის შემწოვი საშუალებები
- კათეტერები
- ჩაცმა-გახდაში დამხმარე საშუალებები
- საკვებისა და სასმელის მიღებაში დამხმარე საშუალებები.
განაგრძეთ კითხვა ამ საშუალებების შესახებ მოკლე გაცნობითი ინფორმაციისთვის.
შხაპის სკამები
შხაპის სკამები თავსდება საშხაპეში ან დასაბან ადგილას, რათა ადამიანი დაჯდეს დაბანისას.
შხაპის სკამები გამოსადეგია მათთვის, ვისაც ბანაობისას არ შეუძლია უსაფრთხოდ დგომა ან/და წონასწორობის შენარჩუნება.
გახსოვთ პიტერი?
მას ზურგის ტვინის დაზიანება აქვს და პარალიზებულია წელს ქვემოთ. გადაადგილებისთვის ეტლს იყენებს. პიტერს სააბაზანოში შხაპის სკამი აქვს. ის სააბაზანოში შეიგორებს ხოლმე თავს და შხაპის სკამზე გადადის. შემდეგ კი მოარიდებს ეტლს წყალს და იღებს შხაპს.
შხაპის გორგოლაჭებიანი სკამები გამოსადეგია მათთვის, ვისაც ბანაობისას ესაჭიროება ჯდომა და, ასევე, უჭირს საშხაპემდე ან დასაბან ადგილამდე მისვლა ან იქიდან წამოსვლა.
გახსოვთ რონინი?
სანამ ავარიის შედეგად მოტეხილი ფეხი და მხარი შეუხორცდება, შხაპის გორგოლაჭებიან სკამს იყენებს. სკამი საწოლის გვერდით უდგას და მასზე გადასვლაში მშობლები ეხმარებიან. შემდეგ კი სკამით შეაგორებენ შხაპის მისაღებ ადგილას, სადაც ეხმარებიან შხაპის მიღებაში.
შხაპის სკამების და მათით უზრუნველყოფის შესახებ დამატებითი ინფორმაციისთვის, გაიარეთ TAP-ის შხაპისა და უნიტაზის სკამების მოდული.
უნიტაზის სკამები
უნიტაზის სკამებს ამოჭრილი სავარძელი, სამკლავურები და მოხსნადი კონტეინერი, ზოგიერთს კი საზურგეც აქვს.
მათი გამოყენება შესაძლებელია ან:
- უნიტაზის ზემოდან (მოხსნადი კონტეინერის გარეშე) ან ტუალეტისგან განცალკევებით
- ნებისმიერ იზოლირებულ ადგილას (მოხსნადი კონტეინერით).
უნიტაზის სკამები, ჩვეულებრივ, უნიტაზთან შედარებით, გთავაზობთ უფრო მეტ საყრდენს დაჯდომის, ჯდომისა და ადგომისთვის.
უნიტაზის ზოგიერთი სკამი ბორბლებით არის აღჭურვილი.
უნიტაზის სკამები შესაძლებელია გამოსადეგი იყოს მათთვის, ვისაც:
- უჭირთ ტუალეტამდე მისვლა და დაბრუნება ან/და
- უჭირთ უნიტაზზე დაჯდომა-ადგომა
- ესაჭიროებათ დახმარება ტუალეტის უნარ-ჩვევების დასწავლის ან ხელახლა დაუფლების დროს (უნიტაზის გამოყენების ტრენინგი) კომფორტულად დასაჯდომად.
გახსოვთ აიდა?
ინსულტის გადატანის შემდეგ აიდამ შენიშნა, რომ გაუძნელდა ტუალეტამდე მისვლა და უნიტაზზე დაჯდომა-ადგომა.
ახლა ის მოხსნადი კონტეინერის მქონე უნიტაზის სკამს იყენებს.
დღის განმავლობაში კონტეინერს ხსნიან და სკამს ათავსებენ უნიტაზის ზემოდან.
ასე აიდასთვის უნიტაზზე დაჯდომა-ადგომა უფრო იოლი ხდება, რადგან უნიტაზის სკამი უფრო მაღლა დგას და აქვს სამკლავურები, რომელზეც შესაძლებელია დაყრდნობა. ტუალეტამდე მისვლასა და უკან დაბრუნებაში ქალიშვილი ეხმარება.
ღამით უნიტაზის სკამი კონტეინერით აიდას საწოლის გვერდით დგას .
მას თავისით, ქალიშვილის გაღვიძების გარეშე, შეუძლია უნიტაზის სკამზე გადასვლა. კონტეინერს დილით ცლიან.
უნიტაზის სკამებისა და მათი უზრუნველყოფის შესახებ დამატებითი ინფორმაციის მისაღებად, გაიარეთ TAP მოდული შხაპისა და უნიტაზის სკამების შესახებ.
სითხის შემწოვი საშუალებები
TAP მოიცავს ისეთ შემწოვ პროდუქტებს, რომლებსაც ადამიანი ატარებს. ისინი:
- სხვადასხვა ფორმისა და ზომისაა
- შესაძლებელია გამოყენება ბიჭების, გოგონების, მამაკაცებისა და ქალების მიერ
- მოიცავს პროდუქტებს, რომლებიც მოსახერხებელია მსუბუქი, საშუალო სიმძიმის ან მძიმე გაჟონვის შემთხვევაში და
- შესაძლებელია გაირეცხოს და ხელახლა მოხდეს მათი გამოყენება ან ერთჯერადად მოხდეს გამოყენება. შემდგომი გადაყრით (ერთჯერადი გამოყენების).
შემწოვი პროდუქტები შესაძლებელია გამოსადეგი იყოს მათთვის, ვისაც აღენიშნება შეუკავებლობა. ის აგროვებს შარდის ან/და განავლის გამონაჟონს და ეხმარება ადამიანს კანისა და ტანსაცმლის დაცვაში, რაც საშუალებას აძლევს მას გააგრძელოს ყოველდღიური ცხოვრება.
გახსოვთ ელაიშა?
ელაიშას ცერებრული დამბლა აქვს და უჭირს საკუთარი მოძრაობების კოორდინაცია და კონტროლი. ის, როგორც წესი, გრძნობს, თუ როდის სჭირდება ტუალეტში წასვლა და დედა ეხმარება მას ტუალეტამდე მისვლასა და სარგებლობაში.
თუმცა, ზოგჯერ ის ვერ აკონტროლებს შარდის ბუშტსა და ნაწლავებს. როდესაც ელაიშა სკოლაშია, საფენებს ატარებს, რომელთა გაკეთება და მოხსნა მარტივია. ეს ხელს უწყობს შარდის ან განავლის ყველანაირი გაჟონვის მართვაში.
დამატებითი ინფორმაციისთვის შემწოვ პროდუქტებსა და მათ უზრუნველყოფაზე, გაიარეთ TAP მოდული შემწოვი პროდუქტების შესახებ.
კათეტერები
კათეტერი დრეკადი მილია, რომელსაც შარდი გამოაქვს შარდის ბუშტიდან.
კათეტერები შესაძლებელია გამოსადეგი იყოს მათთვის, ვისაც უჭირს შარდის ბუშტის დაცლა.
არსებობს კათეტერის ორი ძირითადი ტიპი:
- ხანგამოშვებითი (ასევე უწოდებენ ნელატონის კათეტერებს)
- ხანგრძლივი გამოყენების (ასევე უწოდებენ ფოლეის კათეტერებს)
ხანგამოშვებითი (ნელატონის) კათეტერები
ნელატონის კათეტერები შეჰყავთ შარდის ბუშტში შარდის გამოსადევნად, შემდეგ კი იღებენ მას.
ეს კეთდება მთელი დღის მანძილზე, მაშინ, როდესაც ადამიანს ესაჭიროება შარდის ბუშტის დაცლა.
შარდის ბუშტის დასაცლელად პიტერი ხანგამოშვებით კათეტერს იყენებს. ყოველდღიურად ჩვეულ დროს, პიტერი კათეტერს იყენებს შარდის ბუშტიდან შარდის უნიტაზში ჩასაცლელად.
ხანგრძლივი გამოყენების (ფოლეის) კათეტერები
შეჰყავთ შარდის ბუშტში და ტოვებენ თორმეტ კვირამდე. კათეტერს შარდი გამოაქვს შარდმიმღებ ჩანთაში, რომელსაც ცლიან რეგულარულად.
ხანგრძლივი გამოყენების კათეტერები, ასევე, შესაძლებელია გამოყენებულ იქნეს იმ ადამიანების დასახმარებლად, რომლებსაც აქვთ შარდის შეუკავებლობა, თუ შარდის შემაკავებელი სხვა დამხმარე საშუალებები არ არის მოსახერხებელი.
გაიცანით მარია
მარიას გაფანტული სკლეროზი აქვს, მდგომარეობა, რომელიც აზიანებს თავის ტვინისა და ზურგის ტვინის ნერვებს. გადასაადგილებლად იყენებს ეტლს, ხელების გამოყენება კი შეზღუდული აქვს. მარიას მომვლელი ჰყავს, რომელიც მას თავის მოვლაში ეხმარება.
მარიას შარდის ბუშტის დასაცლელად კათეტერი ესაჭიროება და გადაწყვეტილი აქვს ხანგრძლივი გამოყენების კათეტერის მოხმარება.
გარეგანი კათეტერი (ურიდომი)
გარეგანი კათეტერი არის კიდევ ერთი ვარიანტი (შემწოვი პროდუქტების), რომელიც მამაკაცებს შეუძლიათ გამოიყენონ შარდის გაჟონვის შესაკავებლად. მისი მიმაგრება ხდება პენისზე, ბოლო კი უერთდება მოკლე, დრეკად მილს. შემდეგ მილი მაგრდება შარდმიმღებ ჩანთაზე.
დამატებითი ინფორმაციისთვის სხვადასხვა ტიპის კათეტერებზე და მათით უზრუნველყოფაზე, გაიარეთ TAP მოდული კათეტერების შესახებ.
ჩაცმა-გახდაში დამხმარე თავის მოვლის საშუალებები
დამხმარე ჯოხი ჩაცმა-გახდისას
ჩაცმა-გახდისას დამხმარე ჯოხს ერთ ბოლოზე აქვს "c" ფორმის, ხოლო მეორეზე "s" ფორმის კაუჭი.
გამოიყენება ტანსაცმლის ჩაცმის ან გახდის ხელშესაწყობად.
ჩაცმა-გახდისას დამხმარე ჯოხები შესაძლებელია გამოსადეგი იყოს მათთვის, ვისაც არ შეუძლია წინ ადვილად დახრა, ან შეზღუდული აქვს მოძრაობა ერთ ან ორივე მხარში.
ფეხსაცმლის გრძელტარიანი მაშველი
ეს არის ფეხსაცმლის მაშველი არასტანდარტულად გრძელი ტარით, რომელიც ეხმარება ადამიანს ფეხსაცმელში ფეხის ჩადგმაში.
შესაძლებელია გამოსადეგი იყოს მათთვის, ვისაც არ შეუძლია წინ ადვილად დახრა ან მათთვის, ვისაც შეზღუდული აქვს ხელის ან ფეხის მოძრაობა.
წინდის ჩასაცმელი დამხმარე საშუალება
წინდის ჩასაცმელი დამხმარე საშუალება არის დრეკადი პლასტმასის ნაჭერი, ბოლოებზე დამაგრებული ორი ზონრით. წინდა ან გეტრი ეცმევა პლასტიკის ბოლოზე, შემდეგ კი ადამიანი ფეხს ათავსებს წინდაში და იყენებს მოწყობილობას წინდის მაღლა ასაწევად ორი ზონრის საშუალებით.
წინდის ჩასაცმელი დამხმარე საშუალება შესაძლებელია გამოსადეგი იყოს მათთვის, ვისაც უჭირს წინდების ან გეტრების ჩაცმა, თუ ისინი ადვილად ვერ იხრებიან წინ ან/და აღენიშნებათ მხრის შეზღუდული მოძრაობა.
გახსოვთ აიდა?
აიდას ჩაცმა გაუჭირდა ინსულტის გადატანის შემდეგ. თუმცა, დაიწყო ჩაცმა-გახდისას დამხმარე ჯოხის, წინდის ჩასაცმელი დამხმარე საშუალებისა და ფეხსაცმლის გრძელტარიანი მაშველის გამოყენება. ამ საშუალებების ქონა ნიშნავს, რომ მას ახლა დამოუკიდებლად შეუძლია ჩაცმა.
ღილისა და ელვის შესაკრავი კაუჭი
ღილისა და ელვის შესაკრავს ერთ ბოლოზე აქვს "c" ფორმის კაუჭი ელვის გასაქაჩად, ხოლო მეორე ბოლოზე - ალმასის ფორმის კაუჭი ღილების ღილის ხვრელებში გამოსაყვანად.
შესაძლებელია გამოსადეგი იყოს მათთვის, ვისაც აქვს ხელის ნატიფ მოძრაობასთან დაკავშირებული სირთულეები.
გახსოვთ სემუელი?
სამუელს უჭირს ისეთი ნატიფი მოძრაობების შესრულება, როგორიცაა ღილებისა და ფეხსაცმლის თასმების შეკვრა. ჩაცმის გასაადვილებლად ის იყენებს ღილისა და ელვის შესაკრავ კაუჭს.
ასევე იცვამს ფეხსაცმელს, რომელსაც თასმების მაგივრად ასაფხრეწი შესაკრავი აქვს, რასთან თავის გართმევა მისთვის უფრო მარტივია.
თავის მოვლის დამხმარე საშუალებები საკვებისა და სასმელის მიღების ხელშესაწყობად
ადაპტირებული დანა-ჩანგალი
სამზარეულოს ნივთები, როგორიცაა დანები, ჩანგლები, კოვზები და ჩხირები, შესაძლებელია ადაპტირდეს, რათა უფრო მარტივი გახდეს მათი დაჭერა.
სქელი სახელურები შესაძლებელია უფრო მარტივი დასაჭერი იყოს მათთვის, ვისაც ხელის მოძრაობა და ძალა აქვს შეზღუდული.
შესაძლებელია დაემატოს რბილი ან მყარი მარყუჟი, დანა-ჩანგლის ხელზე დასაფიქსირებლად. ეს გამოსადეგია მათთვის, ვისაც არ შეუძლია სამზარეულოს ნივთების დაჭერა, მაგრამ შეუძლია ხელი ამოძრაოს და აკონტროლოს.
თეფშის დამცავი კანტები და ადაპტირებული თეფშები/ჯამები
თეფშის დამცავი კანტი ნახევრად წრიული პლასტიკია, რომელიც ემაგრება თეფშის გვერდს.
ადაპტირებულ თეფშებს ან ჯამებს აქვს "ჩაშენებული" დამცავი კანტი - თეფშის ან ჯამის ერთი მხარე ამაღლებულია.
თეფშის დამცავი კანტი და ადაპტირებული თეფშები გამოსადეგია მათთვის, ვისაც ჭამისას მხოლოდ ერთი ხელის გამოყენება შეუძლია, ვინაიდან ისინი ეხმარება საკვების აღებაში ან ჩანგალზე, კოვზზე ან სამზარეულოს სხვა ნივთებზე გადატანაში.
ადაპტირებული ჭიქები
ადაპტირებულ ჭიქებს შესაძლებელია ჰქონდეს სახელურები, უფრო ადვილად დასაჭერად, ან/და თავსახური პატარა ხვრელით, ადვილად, დაღვრის გარეშე, დასალევად.
ადაპტირებული ჭიქები შესაძლებელია გამოსადეგი იყოს მათთვის, ვისაც შეზღუდული აქვს ხელის მოძრაობა ან ძალა, ან დარღვეული აქვს კოორდინაცია.
გახსოვთ ელაიშა?
ელაიშას უჭირს საკუთარი მოძრაობების კოორდინაცია და კონტროლი.
ის იყენებს ადაპტირებულ ჭიქას ორი სახელურითა და თავსახურით, რომლის დაჭერა მისთვის უფრო იოლია და დაღვრის პრევენციას ახდენს.
ის ასევე იყენებს სქელტარიან კოვზს და მარყუჟს, რომელიც ეხმარება მის დაჭერაში.