ნაბიჯი პირველი - შერჩევა
დამხმარე პროდუქტის მიწოდების პირველი ნაბიჯი არის პროდუქტის შერჩევა, რომელიც საუკეთესოდ აკმაყოფილებს ადამიანის მოთხოვნილებებს, მისი ჯანმრთელობის, ცხოვრების სტილისა და საცხოვრებელი ადგილის გათვალისწინებით.
ეს ნაბიჯი მოიცავს შეფასების ჩატარებას ინფორმაციის შესაგროვებლად ადამიანის ჯანმრთელობის, აქტივობისა და შესაძლებლობების შესახებ, აგრეთვე იმაზე, თუ სად გამოიყენებს იგი დამხმარე პროდუქტს.
შეფასება ყოველთვის ტარდება იმ ადამიანთან ერთად, რომელსაც ესაჭიროება პროდუქტი და, საჭიროების შემთხვევაში, ოჯახის წევრებთან ან მომვლელებთან ერთად.
TAP პროდუქტის მოდულების უმეტესობა გთავაზობთ შეფასების ფორმის ნიმუშს, რომლის გამოყენება შეიძლება შემდეგ შემთხვევებში:
- შეფასების წარმართვა კონკრეტული დამხმარე პროდუქტისთვის
- სწორი დამხმარე პროდუქტის შერჩევა შეგროვებული ინფორმაციის, პიროვნების არჩევანისა და ხელმისაწვდომი დამხმარე პროდუქტების გათვალისწინებით
- ინფორმაციის ჩაწერა ჩატარებული მოქმედებების ჩათვლით, როგორიცაა სხვა სერვისზე მიმართვა.
სათანადო დამხმარე პროდუქტის შესარჩევად, მნიშვნელოვანია გქონდეთ ხელმისაწვდომი პროდუქტების ასორტიმენტი. პროდუქტების ასორტიმენტის არსებობა აადვილებს ადამიანების სხვადასხვა მოთხოვნილებების დაკმაყოფილებას. ეს მოიცავს ადგილს, სადაც ისინი ცხოვრობენ და მუშაობენ, აგრეთვე მათთვის ხელმისაწვდომ სერვისებს.
გაიცანით მერე.
მერეს სმენის დაქვეითება განუვითარდა დაწყებით სკოლაში სწავლის დროს და მას მიმართვა მისცეს ადგილობრივ სერვისში სმენადაქვეითებულთათვის.
სერვისში იგი დედასთან ერთად მივიდა, სადაც შეფასება ჩაუტარდა. სერვისის პროვაიდერმა მერეს დაუსვა კითხვები ჯანმრთელობაზე, ცხოვრებაზე შინ და სკოლაში, მის საყვარელ აქტივობებზე.
მას ასევე ჰკითხეს იმ აქტივობების შესახებ, რომლებიც სმენის დაქვეითების გამო უჭირდა. შემდეგ მერეს სმენის შემოწება ჩაუტარეს. სერვისის პროვაიდერმა მიღებული ინფორმაცია შეიტანა შეფასების ფორმაში. შემდეგ მან მერეს და დედამისს აჩვენა ორი სახის დამხმარე საშუალება სმენადაქვეითებულთათვის, რომელიც მერეს დაეხმარებოდა.
პროვაიდერმა განმარტა თითოეულის დადებითი და უარყოფითი მხარეები.
მერემ აირჩია „ყურის უკან“ დასამაგრებელი სმენის ციფრული აპარატი.